اسلام آباد۔9فروری(اے پی پی):وفاقی وزیرخزانہ ومحصولات سینیٹرمحمد اسحاق ڈارآکھیے حکومت سڑکاں دی لمبائی ودھاوݨ وحالت زار کوں بہترکرݨ تے روڈ سیفٹی قوانین اچ بہتری سانڳے کم کریندی پئی اے، پارلیمینٹرین روڈ سیفٹی قوانین اچ بہتری کیتے کردار اداکریندے پئن ، بطورپارلیمینٹرین روڈ سیفٹی دے مسئلیں دا حل ساݙی ذمہ واری اے، اساکوں مقامی اتےعالمی سطح تے ایں حوالے نال رل تے کم کرما ہوسی ۔ وزیرخزانے اے ڳالھ خمیس کوں اتھاں روڈسیفٹی کانفرنس پارلیمینٹرینز دے اختتامی سیشن توں خطاب کریندے ہوئیں آکھی ۔ وزیرخزانہ آکھیے روڈ سیفٹی کانفرنس دا انعقاد خوش آئند اے،ہر سال سڑکاں تے حادثیں اچ قیمتی جاناں دا ضیان تھیندا پئے ، پوری دنیا اچ نینگراں دی اموات دی وݙی وجہ سڑکاں تے شاہراہواں تے تھیوݨ آلے حادثے ہن ، سڑکاں تے رٹریفک ودھدی پئی اے ایں تناظراچ سماجی ترقی کیتے روڈ سیفٹی یقینی بݨاوݨی ہوسی ۔انہاں آکھیے اڄ دی کانفرنس توں بین الپارلیمانی یونین اچ شامل ملکاں اچ روڈ سیفٹی تے جامع ایکشن پلان بماوݨ اچ مدد ملسی ، وزیرخزانہ آکھیے پاکستان اچ 5750 ہزارکلومیٹرطویل سڑکاں داانفراسٹرکچر موجود اے جیں اچ موٹرویز اتے ایکسپریس ویز سودھے پرائمری اتے سیکنڈری سڑکاں شامل ہن۔ انہاں آکھیے حکومت سڑکاں دے مختلف منصوبیں تے جاری مالی سال اچ 100.4 ارب روپے خرچ کریندی پئی اے ۔ وزیرخزانہ آکھیے 2020 اچ ملک دی سڑکاں تے 34 ملین گاݙیاں ہن ، مڈل کلاس اچ ودھارے توں ڳاݙیاں دی تعداد ودھ ڳئی اے ۔ مسلم لیگ 1990 دے ݙھاکے اچ ایم ٹو دے ناں توں لاہوراسلام آباد موٹروے منصوبہ شروع کیتا، ایں کوں ہݨ ملک اچ کھنڈا ݙتا ڳئے تے ہݨ تئیں ملک دے ٻہوں سارے حصیں کوں کور کیتا ڳئے ۔موٹرویز دے منصوبیں کوں چین پاکستان اقتصادی راہداری نال وی رلاݙتا ڳئے۔
