اسلام آباد۔9مارچ(اے پی پی)پاکستان بھارت دے غیر قانونی زیر قبضہ جموں و کشمیر دے گورنر دے بیان دی مذمت کریندے آکھیے جو اینڄھاں بیان بھارتی قیادت دے جارحانہ عزائم دا ہک ٻیا نمونہ ڄیڑھا خطے دے امن و استحکام کیتے مسلسل خطرہ اے، پاکستان اتے امریکہ وچال انرجی سکیورٹی ڈائیلاگ اتے کلائمیٹ اینڈ انوائرمنٹ ورکنگ گروپ دے مذاکرات آئندہ ہفتے تھیسن۔ اسلام اباد اچ ہفتہ وار بریفنگ ݙیندے ترجمان دفتر خارجہ ممتاز زہرہ بلوچ وزیر اعظم محمد شہباز شریف دے دورہ قطر اچ ݙوطرفہ ملاقاتاں اتےا قوام متحدہ دی کانفرنس اچ شرکت دے معاملے تے اڳونہی دا ݙسایا۔ ترجمان آکھیے جو وزیر خارجہ بلاول بھٹو زرداری تریمتیں دے عالمی ݙینھ سانڳے تقریبات کیتے نیویارک اچ ہین، ایں سانڳے او اقوام متحدہ ولوں تریمتیں دے مسلیاں تے مباحثاں اچ شرکت و خطاب سودھا او آئی سی وزرائے خارجہ کونسل دے شریک چیئر دے طور تے اسلامو فوبیا اتے اسلام اچ تریمتیں دے کردار بارے تقریبات اچ وی شرکت کریسن۔ ترجمان جرمن وزیر مملکت ڈاکٹر ٹوبیاس لنڈر دے پاکستان دے ݙو ݙینھ دے دورے تے وی بریفنگ ݙتی جنھاں وزیر مملکت خارجہ امور حنا ربانی کھر، وزیر موسمیاتی تبدیلی سینیٹر شیری رحمان اتے وزیر تجارت سید نوید قمر نال مالقااں کیتن اتے تجارت و سرمایہ کاری، اعلیٰ تعلیم تے پیشہ وارانہ تربیت، نقل مکانی اتے موسمیاتی تبدیلی سودھا قابل تجدید توانائی دے شعباں اچ تعاون تے الایا۔ ترجمان پاک امریکا انسداد دہشت گردی ڈائیلاگ سانڳے اڳونہی، امریکی وفد دیاں ملاقاتاں اتے پاک امریکا انسداد دہشتگردی تعاون، علاقائی انسداد دہشت گردی منظرنامے، سائبر سیکورٹی اتے پرتشدد انتہا پسندی کیتے پیش رفت تے اطمنینان کیتا۔ انعاں تاخقند اچ افغانستان دے ہمسایہ ملکاں دے خصوصی نمائنداں دے اجلاس اچ پاکستان دے موقف اتے ترجیحات بارے وفد دیاں کوششاں دا ݙسایا۔ ترجمان ٻھارتی مقبوضہ کشمیر اچ انسانی حقوق دیاں سنگین خلاف ورزیاں تے ولا ڄڳ دی توجہ ݙویندے آکھیے جو پاکستان ایں بارے اقوام متحدہ اتے ڄڳ کوں سڄاکا کریندا رہسی۔ انہاں ݙسایا جو وزیر مملکت خارجہ امور حنا ربانی کھر 10 مارچ کوں بحرین دے شہر منامہ اچ سالانہ منامہ ڈائیلاگ اچ شرکت کریسن اتے اہم ملاقاتاں کریسن، وزیر مملکت لندن اچ 13 توں 15 مارچ تئیں دولت مشترکہ دے وزرائے خارجہ امور دے اجلاس سانڳے وی برطانیہ دا سرکاری دورہ کریسن۔ انہاں آکھیا جو اقوام متحدہ دے سیکرٹری جنرل دے نائب خصوصی نمائندے برائے افغانستان مارکس پوٹزل 9 توں 10 مارچ کوں پاکستان دا دورہ کریندے پن جیندے اچ افغانستان دی صورتحال تے ڳالھ مہاڑ تھیسی ڄݙاں جو آندے ہفتے پاک امریکا ݙو اہم مذاکرات جیندے اچ انرجی سکیورٹی ڈائیلاگ اتے کلائمیٹ اینڈ انوائرمنٹ ورکنگ گروپ تھیسن ڄیڑھے توانائی دے مسلے دے حل کیتے ݙوطرفہ تعاون کیتے اہم ہین۔
