ایشیائی ترقیاتی بینک پاکستان کوں مختلف منصوبوں کیتے 76 کروڑ 40 لکھ ڈالر قرض ݙیسی ،سردار ایاز صادق

اسلام آباد۔15دسمبر (اے پی پی) وفاقی وزیراقتصادی امور سردار ایاز صادق آکھیے جو ایشیائی ترقیاتی بینک پاکستان کوں مختلف منصوبیں کیتے 76 کروڑ 40لکھ ڈالر قرض ݙیسی۔ایشیائی ترقیاتی بینک(اے ڈی بی)نال دستخطاں دی تقریب توں خطاب کریندے ہوئیں انہاں آکھیے جو کجھ لوک ملک دے ڈیفالٹ کرݨ دے حوالے نال آپݨی سیاست اچ لڳے ہوئن لیکن انہاں دا اے خواب شرمندہ تعبیر نہ تھیسی ۔ انہاں آکھیے اے ڈی بی نال اکنامک افیئرز ڈویژن اتے حکومت کجھ پراجیکٹ تے دستخط کریندی پئی اے ، اڄوکے سال تقریباً9 مہینے اچ 2.67ارب ڈالر دے معاہدیں تے دستخط کیتے ڳئن تے اے ڈی بی سوکھیاں شرطاں تے قرضہ ݙیندا پئے ۔ انہاں آکھیے اپریل توں گھن تے ہݨ تئیں 2.3 ارب ڈالر دے معاہدیں تے دستخط کیتے ڳئن جنہاں اچ کیپٹل مارکیٹ بجٹ سپورٹ دے تحت300 ملین ڈالر دے معاہدیں تے دستخط تھئن ۔ ایاز صادق آکھیے بی آر اے سی ای(براس) پروگرام دے تحت 1.5 ار ب ڈالر خیبرپختونخوا اچ صحت دے شعبے کیتے 100 ملین ڈالر،فلڈ ریلیف کیتے 3 ملین ڈالر ، کے پی کے اچ واٹر ریسورس کیتے 3.6 ملین ڈالر،نولنگ ڈیم دی فزیبلٹی سٹڈی کیتے 5 ملین ڈالر تے ایمرجنسی فلڈ لون کیتے 475 ملین ڈالر ݙتے ویسن جیں تے صرف ھک فیصد مارک اپ ہوسی جیڑھا جو 40 سال دی مدت اچ واجب الادا ہوسی۔

مضمون کا ماخذ : نتیجہ ڈوپلا سینا

متعلقہ مضامین