اسلام آباد۔10دسمبر(اے پی پی)وفاقی وزیر اطلاعات و نشریات مریم اورنگزیب پی ٹی آئی کوں ” پروپیگنݙا گرو” قرار ݙیندے آکھیے جو پی ٹی آئی اتے عمران خان ڈیلی میل کوں پاکستان دی غیر ملکی امداد رکوواݨ کیتے استعمال کیتے، ڈیلی میل دی خبر دا مقصد پاکستان دی عالمی سطح تے ساکھ تباہ کرݨ ہا جو ایندے نال پاکستانی قوم، اداراں اتے قیادت کوں چور ݙکھاوݨ دی گھٹیا چال چلی گئی، چیلنج کریندی آں جو اسمبلیاں تروڑݨ دی ڳالھ شوشہ اے، عمران خان اپݨے ارکان دے استعفی ݙکھا ݙیون، انہاں ڄاݨ ٻڄھ تے پاکستان دی معیشت، روزگار، کاروبار، اداریاں کوں تباہ کرݨ دی کوشش کیتی اے اتے اپݨے اقتدار اچ ملک دا وݙا نقصان کیتے، اڄ جیڑھی غربت اے او “عمران پلان” پاروں اے جیکوں ریورس کرݨ اچ کڄھ ویلھا لڳسی۔ اے ڳالھ انہاں اسلام آباد اچ پریس کانفرنس کریندے آکھی۔ انہاں آکھیا جو 2018ء اچ کھلنڈراں دا ہک پروپیگنڈا گروپ ایں ملک تے مسلط تھیا ہا جئیں ملک دا نقصان کیتے، اختیارات دے ناجائز استعمال نال سیاسی مخالفین کوں انتقام دا نشانہ ٻݨائے، رانا ثنا اللہ تے کوڑا کیس ایندی مثال اے جیڑھا عدالت تہاݙے منہ تے ماریے، اڄ تساں آہدے او جو نیب دے قانون اچ ترامیم کر تے فیدہ چیندے پن، کیا ڈیلی میل وی ساݙے نال رلیا ہوئے؟ انہاں کولو چوری دا پچھو تا ڳالھیں مندے اتے دھمکیاں تے آ ویندن، عمران خان کوں 22 کروڑ عوام نال کیتے ڳئے ظلم دا حساب ݙیوݨا پوسی۔ مریم اورنگزیب آکھیا 2018 اچ سازش ہی تاں کیتی ڳئی ہئی جو آر ٹی ایس ٻلھا تے 3 واری دے وزیراعظم کوں اقامہ تے فارغ کیتا ڳئے اتے ہسدا وسدا پاکستان پروپیگنڈاگروپ دے ہتھے لڳ ڳئے ڄئیں ملک کوں ݙیوالہ کرݨ دی کندھی تے آن چھوڑیے، اڄوکی حکومت ملکی معیشت کوں تکڑا کرݨ اچ ردھی ہوئی اے ڄیڑحی تیکھے کامیاب تھیسی۔
